Hier finden Sie eine Auswahl von Samichlaus Versli.
Arme Chlaus, wie häsch’s du sträng!
Arme Chlaus, wie häsch’s du sträng!
gäll, da Weg isch grüüsli lang,
zu de Chinde, zu de nette
wo so gern äs Päckli hetted!
Säg mer, langts ächt au für mi,
wänn ich ganz ä Liebi bi?
De Samichlaus lueget zfride dry
De Samichlaus lueget zfride dry
wie setts au chönne andersch sy
Da schönschti Mantel leit er a
mit glänzig wisse Pelzli dra
Es stampfet gmüetlich dur e Schnee
det stoht es Häsli, det es Reh
Schneflöckli drohlet weid und zart
ganz lisli, lis i Chlausebart
Die erschte Hüser sind nümme wyt
s isch Chlausetag du liebi Zyt
Es dunkled scho dur t’Gasse i
Es dunkled scho dur t’Gasse i,
de Samichlaus chunnt jetzt dänn glii.
En tüüfe, tüüfe Wind blaas i sis Horn.
Viellicht, viellicht gits Schnee bis Morn?
De Samichlaus währ sicher froh,
dänn chönnter mit em Schlitte cho.
Es dunklet schu dä Waldweg i
Es dunklet schu dä Waldweg i
und d’Rehli wei goh schlofä
diä erschtä Sternli chämed gli
eis isch schu vürä g’schloffä!
Im Wald innä git äs Glöggli a
und jetztä chunnt än Schlittä,
es chunnt än schönä wiissä Maa,
ganz lisli anä g’rittä!
Juhe, äs isch dä Samichlaus,
wiä mag er z’friedä lachä,
er wett hüt bravi Chindä g’seh
und alli glücklich machä!!
Es Liechtli chunnt de Feldweg i
Es Liechtli chunnt de Feldweg i
i glaub das mues da Samichlaus si
Jetz ghört mer’s Glöggli, still und guet
wie’s über d’Wiese lüüte tuet
Mis Herzli chlopfet lies und fescht
ich hoff due weisch vo mir nur’s bescht
Die andere chliine dumme Sache
wetti s’nächscht Jahr besser mache
Drum bitte lueg in Sack jetzt drii
ob’s öppis het für mich derbi
Es nachtet scho und s schneielet
Es nachtet scho und s schneielet,
du liebi Zyt, ganz grisch,
de Chlaus leit jetzt si Mantel aa,
und bschlüsst drui na sys Hüüsli.
Er holt de Schlitte us em Schopf,
spannt s Eseli gschwind aa,
und ladet de Sack und d Fitzen uuf,
won er für d Chind mues haa.
”Hü Trämpeli”, seit er, ”s isch Zyt,
de weg is Stedtli isch na wyt!
Mer händ hüt z Abig gar vil z tue,
hü, Trampeli, lauf artig zue!”
wie sind die Seck so dicht und schwer,
wer chunnt ächt d Fitze über, wer?
De Chlaus weiss alles ganz genau,
drum, Chinde, bitti folgend au!
Für vieles stellt mer hüt Roboter a
Für vieles stellt mer hüt Roboter a,
mer seit ohni Computer chas nöd gah.
Es git Ragete und Satelite,
und doch wird uf de Erde immer no gschtritte.
Mer schafft vieles ab und tuet ume hetzte,
nur dich Samichlaus cha niemer ersetzte.
Du lasch dich nöd vom Moderne la leite,
und läbigi Schmutzli tüend dich begleite.
Ziesch all Jahr z‘ fuess dur euses Land,
dreisch immer s‘ rot und goldig Gwand,
für jedi Familie häsch Zit und machsch halt.
Ich danke dir im Name vo jung und alt.
Gäll Samichlaus Jahr y, Janr us
Gäll Samichlaus Jahr y, Janr us,
wohnsch Du alleini i dim Huus.
Isch das für Di ned mängisch schwär?
Wettsch nöd dass öper bi dir wär?
Mit wäm chasch Du am Abe brichte?
U wäm verzellsch Du Dini Gschichte?
U bisch de chrank, wer luegt zu Dir,
wer macht der Tee u wäscht der s’Gschir?
We truurig bisch, wer tröstet Di?
Mit wäm trinksch du Dis Glesli wy?
Nei Samichlaus, i glaube halt,
Du redisch mit de Tier im Wald!
Versteisch Du d’Rehli, d’Füchs u d’Hase?
Gäll Chlaus ich bin e Gwundernase!
Heiterebeck
Heiterebeck, Samichlaus, ich freu mi,
äntli bisch du cho!
Wieso hesch de Esel nöd
au grad ine gno?
Heiterebeck! De armi Kärli,
immer muess er warte!
Hätt ihm gern mis Zimmer zeigt
Und vom Chindergarte
S’Bastelzüüg und überhaupt,
all min tolli Plunder.
Samichlaus, chasch sicher sii,
es näämti de Esel wunder.
Samichlaus, wenn wieder chunsch,
bitte dänk de draa,
lass din Esel s’nächste Jahr
nöd verrusse staa.
(Anita Schorno)
Ich bi zwar no e chlyne Stompe
Ich bi zwar no e chlyne Stompe
aber wäg dem lahm ich mich gar nöd lumpe.
Bin halt einfach nonig so gross,
mini Eltere findet mech aber trotzdem famos.
Wenn doch nor is fräche Müüli ned wär,
und s’Artig sy fallt au mer so schwär.
Mängisch mach i scho au dummi Sache,
ich bringe aber au viil Lüüt zom lache.
Öppe emol tuen i au im Mami hälfe
Bim Potze oder bim Ässe i chaufe
Das wächslet haut ständig wie de Wind,
aber schliesslich bin i ja wirklech no es chlyses Chend.
Ich gib mer jetz au es betzeli meh Müeh
wenigschtens vom Obig bis am Morge früeh.
Aber en chlyne Trost, das verspräch ech dir,
irgendwänn besserets sicher au bi mir.
Ich bin än chliinä Pfüderi
Ich bin än chliinä Pfüderi
das sägäd alli Lüüt
ich möcht so gärn än grossä sii
doch streckä,das nützt nüt
gäll Samichlaus, das weisch du scho
chumm glich i üsäs Huus
und läär no vor äm witergoo
dä Sack i’d Stubä us.
Liebe, liebe Samichlaus
Liebe, liebe Samichlaus
die Fitze isch mer so en Graus!
gäll i bi en Brave gsi
drum pack die Fitze wieder ii
Mache mängmol scho chli Gspässli
aber die sind au nit so grässli
dass i müessti a Fitze ha
nimm lieber d Nüssli a
Säge Dir zum Abschied Tschüss
viele Dank für die feine Nüss
hebs no guat und dänn bis gli
es Jahr isch so schnäll verbi
Nun ist es wieder an der Zeit
Nun ist es wieder an der Zeit, es kommt der Nikolaustag
Wir sagen allen, grass und klein, was er bedeuten mag.
St. Nikolaus war ein guter Mann, half vielen aus der Not.
Er ging als Bischof durch das Land und schenkte Geld und Brot.
Er half den armen Leuten gern, als er noch lebte hier,
gab hin mit Liebe all sein Gut, nahm keinen Dank dafür.
Einst hat der Bischof Nikolaus die Menschen sehr erfreut,
drum lieben wir ihn allezeit und ehren ihn noch heut.
O Samichlaus, du guete Maa
O Samichlaus, du guete Maa,
i weiss nüd, öb der’s säge cha-
es truckt mi nämli tüüf im Härz
so öppis wienen liise Schmärz.
Chumm, buck di zue-mer, bis so guet,
dänn säg der, was mi plage tuet!
s isch leider wieder Chrieg u Not,
i mängem Huus fählt’s täglich Brot,
und vieli Chind, i mängem Land
händ weder Mueter, Bett, no Gwand,
de Tod isch der einzig Gascht –
weisch, Samichlaus, drum briegg i fascht.
Bim Bätte han-i geschter dänkt:
Mir alli wärdet riich beschänkt,
mir händ’s im schwizerländli rächt
Und’s goht is allgemein nüd schlächt,
händ Bett und Brot und Gritibänze,
und eusi Auge törfed glänze.
O Samichlaus, min liebe Gascht,
i gseh, du brieggisch sälber fascht –
i ha di doch nur welle bitte:
Legg eis vo mine Gschänk uf d’Siite,
und bring’s doch eim vo dene Chind,
wo ohni Brot und Heimet sind!
S Christchindli und de Samichlaus
Es dunklet scho im Tannewald
Und schneielet ganz lisli.
Was ist das für es liechtli det
I säbem chline Hüsli?-
Da ist der Samichlaus deheim
Mit sine guete Sache!
Er hät scho s Lämpeli azündt
Und tuet grad s Kafi mache.
Da pöpperlets am Lädeli,
und s Glöggli ghört er lüte!
Jetzt weiss er scho, wer dussen ist
Und was das sell bedüte:
sChristchindli chunt na zabig spat,
Es wirt en welle stupfe,
Er mües de Sack bald füreneh
Und sini Finke lupfe!
sChristchindli seit: „Herr Samichlaus,
E schöni ornig händ er!
De Christtag staht ja vor der Tür-
Händ Ihr dänn kei Kaländer?
S brucht Wiehnachtsbäum i jedes Hus,
Für vili hundert Chinde-
Ihr müends im Wald na haue hüt,
De Vollmond sell Eu zünde!“
De Samichlaus stellt d Tasse ab:
„Nu nid so gsprängt, Christchindli-
Die Bäumli müend gwüss bsorget si,
Das Hät na Ziit es Stündli.
Ich möcht jetz ämel na in Rueh
Min z Abig fertig chäue-
Und wänn es Tässli gfellig wär,
So würds mi hezli freue!“
sChristchindli lachet: „nu so dänn,
Da bini nüd dergäge;
Es bitzli öppis warms tuet guet
Uf mine wite Wäge!
Me cha ja dänn na allerlei
Abrede und usmache,
Was jedes Chind sell übercho
Vo dene schöne Sache.“
Si sitzed gmüetli binenand
Im chline Stübli hine
De Vollmond zündt d Laterne a
Und lueget heimli ine;
Er loset lang am Fänsterli
Und uf der Hustürschwelle-
Wänn er nu besser schwätzte chönnt,
Er müesst mers gwüss verzelle.
(Rudolf Ziegler)
Sami nigi nägi
Sami nigi nägi,
hinderem Ofe stecki.
Gib mer Nuss und Bire,
dänn chumi i wieder füre.
Samichlaus wo chunsch du här
Samichlaus, wo chunsch du här?
Siebehundert Stund wiit här!
Samichlaus, isch s’Seckli schwär?
Siebehundert Pfund isch’s schwär!
Samichlaus, mach’s weidli läär!
Denn isch s’Seckli nümme schwär!
Samichlaus wo chunsch du här (2)
Samichlaus, wo chunsch du här?
Warum isch au din Sack so schwär?
Bisch de ganzi Wald dur gloffe?
Hesch villicht s Christchindli troffe?
S het sicher gseit, s chömm au scho glii.
gäll Chlaus, ich bin e Liebi(e) gsii.
Ums Samichlaushüüsli
Ums Samichlaushüüsli
liit schuehtief der Schnee.
Viel hungrigi Tierli
händ es Liechtli drin gseh.
Sie chömet scho z’düüsle
bi Tag und bi Nacht,
Mir händ dene Tierli
es Chrüpfli zwägg gmacht.
Die Häsli, die Rehli –
sie wüssets gar guet,
dass mir zwei sie gärn händ
und das tuet ne guet.
Sie lueget eus früntli
und zuetraulich a.
Was isch säb für es Liechtli
Was isch säb für es Liechtli? Was isch säb für en Schiin?
De Chlaus mit de Latärne lauft grad de Wald dur y.
Sin Esel, de hed glaade, er rüeft, J-a, J-a!
Hüt dörf i mid mim Meischter. Emal is Stedtli ga!
Im Sack, da heds vill Nusse, Tirgel und Zimmedschtärn,
die träg ich, wär’s en Zentner, für d’Chinde eischter gärn!
Aber die tusigs Ruete, die han i ufem Strich
die bruucht min guete Meischter, ja nid emal für mich.
Ich folg ihm gärn uf’s Wörtli, und laufe, was i cha,
die liebe Chind im Stedtli, müend doch au öppis ha!
Samichlaus du liebe Maa
Samichlaus du liebe Maa,
ich ha freud jetzt bisch du da.
Ich ha planget mängi Stund,
bis de Samichlaus – Tag chunt.
D‘ Ruete gäll diä bruch ich nöd,
diä nimmsch du grad wieder mit.
De für lasch gueti Sache daa,
Samichlaus du liebe Maa.
Samichlaus du liebe Maa (2)
Samichlaus, du liebe Maa,
mues ich jetzt go füre staa?
Gäll du bisch nöd bös mit mir,
weisch ich han ächli Angscht vor dir.
Gfolget hani scho nöd immer,
s‘ git no Sach diä sind schlimmer !
Gäll das wämmer jetzt vergässe,
lieber Schnitz und Bire ässe.
Gäll ich dörf jetzt wieder gaa,
Samichlaus du liebe Maa.
Samichlaus du chunsch zu üs
Samichlaus, du chunsch zu üs
mier tüend der Tür ufspeere
Samichlaus chlopf dStifel us
und tue bi üs icheere
Chum i d Stube, dört isch äs warm
chasch de Sack abstelle
ruhe dini müede Bei nume us
mir tüend der gärn verzelle
Vo Dehei und us de Schuel
liebe Samichlaus, sitz uf dä Stuel
muesch ja nöd grad wieder ga
bliib doch bitte no chli da.
Samichlaus im schöne Gwand
Samichlaus im schöne Gwand
mit em Chrummstab i de Hand,
du luegsch so lieb, du guete Maa,
dass mir Chind kei Angscht müend haa!
Samichlaus ich bin en Bengel
Samichlaus ich bin en Bengel,
schläcke so gern Zuckerstangel.
Chönt immer Schoggi schnabuliere,
möcht alii Guetzli uusprobiere.
Uf Chueche hani Appetit,
Chaugummi chatsche isch en Hit.
Nur öppis liit mir zimli fern,
Zähputze tuen i gar nod gärn.
Samichlaus, so chum doch ie,
muesch nöd verusse stoh.
Warum häsch du din Schmutzli
wieder mit dir gno?
Han i öppe zwenig gfolget
s’ganz Johr us und ii?
Ich chan halt au nöd jede Tag
es artigs Bürschtli (Meitli) sii.
Chasch d’Fitze wieder mit dir näh,
gäll, ich bruche keini,
hett lieber Mandarinli
so süessi und so feini.
______________________________________________________
